Psa 137 | NOP | STEP | Indi Babilon kwetneŋ ime woditawiiŋ ime gaga-gaga itouŋa Saiyondok nadiŋa makunum tugumun.

Psalms 137

Isilaehidi Babilon kwetneŋ hatiŋa yohikwehikdok nadiŋa makunum tigiŋ

1 Indi Babilon kwetneŋ ime woditawiiŋ ime gaga-gaga itouŋa Saiyondok nadiŋa makunum tugumun. 2 Tiŋa gita hekinik bem taŋeniŋ kufoloŋgoŋ hakiiŋneŋ uŋgoŋ yehitebinene wodigiŋ. 3 Kaŋ memik tinimiŋa ninigilune kwanaimiŋ kwetneŋ bugumun hekidi indiŋ niniŋgiŋ, “Indi welemomooŋ nadinimdok kap toneŋ, eŋ Saiyon diniŋ kap niŋ toneŋ.”

4 Yokwet noli’walaŋ gineŋ iŋoŋ dediŋ tiŋa Yahwe’walaŋ kap tonim? U tuwot mokoŋ. 5 Nu Jelusalem, dutok kaule nobuniŋ tigamuŋa kaaŋ, gita adi kotigoŋ tuwot mu ulit. 6 Jelusalem, nu du nemek niŋdok nadiwene loloŋnit hinek tilak unduŋ e, dutok mu nadigamuŋa, be nadikaule tigamuŋa, koditne kwambundaune kap kotigoŋ tuwot mu tobit.

7 Yahwe, du Idomhidi mik tinimiŋa kudi dediŋ hinek tiŋa Jelusalem kahilegiŋ u kotigoŋ nadisuweŋ. Medehik indiŋ yogiŋ u maaŋ nadisuweŋ, “Jelusalemhi’walaŋ yot hogohogok ubulagineeŋ yehitubu-kadakadapmaŋ titiŋdok.”

8 Babilon, du adi gehitubu-kadaka hinek titiŋdok. Du kibi dediŋ tinimguŋ, wondok tuwot me kibikoŋ tubu-udanegamdok adi yadi nadifo tibaak. 9 Me wendi wapmihigeye kuyahi-kabe u yahaŋe beŋa kawade foloŋ yehi-ugagayewaak.